Kryeministri Edi Rama një ditë pas mbledhjes së Asamblesë Kombëtare, ku u bënë me dije edhe ndryshimet më të fundit në kabinetin qeveritar ‘Rama’, mblodhi sot në mëngjes kryesinë e Partisë Socialiste.
Në mbledhjen e cila zgjati 60 minuta, u diskutua për çështje organizative për zgjedhjet e 30 qershorit. Po ashtu mësohet se PS po përgatit ndarje të reja të të deleguarve të kryesisë në qarqe.
Në asamblenë e djeshme, kryeministri i vendit informoi për vendimin e tij për të ndryshuar qeverinë, një nga ndryshimet më të mëdha gjatë detyrës së tij. Kryeministri Rama gjithashtu iu përgjigj kritikëve dhe tha se me ndryshimet në kabinetin qeveritar, është hedhur një hap i madh drejt fitores në zgjedhjet lokale të qershorit.