Kryeministri Edi Rama ndodhet në Holandë, ku këtë paradite po zhvillon një bashkëbisedim me përfaqësues të biznesit holandez që operojnë aktualisht në Shqipëri, si dhe me investitorë të rinj potencial, që sipas Ramës janë të interesuar për të zgjeruar aktivitetin e tyre në vendin tonë në sektorë me rëndësi.
“Holanda ka prezencë të mirë në Shqipëri. Këtu janë disa prej aktorëve më kryesorë të kësaj pranie, në një marrëdhënie shumë të rëndësishme për ne që duam ta thellojmë sa më shumë të jetë e mundur. Kemi kënaqësinë dhe privilegjin që kemi në vendin tonë Shelli-in. Ne kemi shumë shpresë sesë shpejti mund të ndajmë me opinionin publik një zbulim shumë të rëndësishëm që SHELL-i po arrin në vendin tonë. Ata hezitojnë për momentin të flasin për shifra. Shenjat tregojnë se mund të jemi pranë një zbulimi shumë të rëndësishëm të gazit dhe naftës nën tokë, që do të ndikojë të ardhmen e vendit tonë por edhe do të luajë rol në të ardhmen energjetike të Europës”.
Ministrja e Infrastrukturës dhe Energjisë, Belinda Balluku shprehu padurimin për rezultatin e eksplorimit të SHELL dhe theksoi që do të jetë një zbulim i madh. “Sa i takon energjisë SHELL po punon në Shqipëri prej kohësh dhe ne po presim me padurim rezultatin e eksplorimit që do të jetë një zbulim i madh, por pa na dhënë detaje për atë çka presim. Shqipëria do të prodhojë sasi të rëndësishme gazi dhe nafte , e ndarë në 40% gazi dhe nafte 60%”.
Kurse ministrja e Financave Delina Ibrahinaj evidentoi lehtësitë fiskale dhe ligjore për investuesit në Shqipëri. “Çdo kompani hedh sytë nga vendet që kanë stabilitet politik e ekonomik. Shqipëria ka dëshmuar që i ka. Kemi punuar për të krijuar procedura të lehta të aksesueshme e transparente dhe investimi në digjitalizim ka kontribuar për këtë gjë”.