Japonia i ka bërë thirrje Iranit që të mos i ofrojë armë Rusisë për luftën e saj kundër Ukrainës.
“Në një takim sot me homologun e tij iranian, Hossein Amirabdollahian në Tokio, ministri i Jashtëm Yoshimasa Hayashi i kërkoi Iranit të veprojë në mënyrë konstruktive në lidhje me luftën e Rusisë”, njoftoi agjencia japoneze e lajmeve Kyodo.
Perëndimi dyshon se Irani ka furnizuar Moskën me dronë për luftën. Zyrtarisht, Irani dhe Rusia e kanë mohuar këtë.
“Në udhëtimin e tij të parë në Japoni gjatë mandatit të tij, ministri i Jashtëm i Iranit i kërkoi gjithashtu Japonisë të lirojë asetet e ngrira”, sipas zëdhënësit të Ministrisë së Jashtme iraniane Nasser Kanaani.
Teherani thuhet se po kërkon rreth 1,5 miliardë dollarë nga Japonia për eksportet e naftës që janë ngrirë si pjesë e sanksioneve ndërkombëtare.
U diskutua gjithashtu për rivendosjen e marrëveshjes bërthamore të Vjenës të vitit 2015. Kjo është pjesë e një përpjekjeje më të gjerë diplomatike nga nënshkruesit e marrëveshjes si Franca, Gjermania dhe SHBA-ja për të frenuar programin bërthamor të Iranit.
Ish-presidenti amerikan Donald Trump u tërhoq në mënyrë të njëanshme nga marrëveshja në vitin 2018 dhe vendosi sanksione të reja, të ashpra ndaj Iranit. Kjo e shtyu Iranin të fillonte të ndërtonte sërish arsenalin e tij bërthamor, pas disa vitesh në pritje.
Disa fuqi botërore tani po bëjnë çmos për të negociuar rihyrjen e Iranit në marrëveshje. Në këmbim, ata do të heqin disa sanksione të vendosura aktualisht ndaj Iranit.