Gjyqtari Erjon Çela ka dhënë dorëheqjen nga shqyrtimi i dosjes së Gërdecit, e cila është rihapur nga SPAK dhe i pandehur është marrë ish-ministri i Mbrojtjes, Fatmir Mediu.
Arsyeja e dorëheqjes është bërë fakti se Erjon Çela ka dhënë njëherë mendim për rastin. Sipas tij, Fatmir Mediu nuk mund të gjykohet pasi afati për veprat penale për të cilat ai akuzohet është parashkruar, shkruan Ora News.
Mirëpo, SPAK nuk e ka pranuar këtë arsyetim dhe Prokuroria ka ankimuar, duke plotësuar dosjen me prova të reja. Fatmir Mediu akuzohet për dy vepra penale të “Shpërdorimit të detyrës”, një e parashikuar nga Kodi Penal dhe një nga Kodi Ushtarak.
Me dorëheqjen e Erjon Çelës seanca gjyqësore është shtyrë dhe javën e ardhshme pritet që një gjyqtar tjetër të caktohet për vlerësimin e dosjes së përpiluar nga Prokuroria e Posaçme.