Të jesh i suksesshëm në jetë nuk do të thotë që gjithë kohës ke qënë i përkëdhelur nga fati. Këtë mund ta themi më së miri për modelen e njohur shqiptare, Angela Martini e cila prej vitesh jeton në Zvicër.
Së fundmi ajo ka publikuar një libër të sajin te quajtur “Dashuri, shpresë, dritë”, bazuar në historinë e fëmijërisë së saj. Angela ka qenë e ftuar në emisionin “Opinion” të Blendi Fevziut ku ka rrëfyer mjaft detaje nga jeta e saj e vështirë në fëmijëri, diçka që nuk e kishte bërë kurrë më parë.
Teksa jetonte me gjyshërit dhe kushërinjtë e saj në Shkodër, dikush ka tentuar ta rrëmbejë dhe ajo ishte vetëm 10 vjeçe.
“Ishte zheg dhe familjarët e mi ishin në gjumë kurse unë po luaja përjashta me një shoqe. Një burrë m’u afrua, më pyeti për familjen dhe më tha se njihte tim atë. Kur i thashë se ai ishte në Zvicër, ai më ofroi akullore dhe më kapi për dore. Kur pashë makinën e tij me disa burra të tjerë brenda, e kuptova çfarë po ndodhte. I kafshova dorën dhe u largova”, ka rrëfyer modelja.
E gjendur në këtë situatë të vështirë, e ëma e nisi Angelën për në Zvicër dhe aty modelja ka hasur vështirësi edhe me njerkën e saj.
Pas ndarjes, i ati i Angelës ishte martuar sërish dhe kishte krijuar një jetë të re në Zvicër.
E pyetur nga Blendi Fevziu se si ishte marrëdhënia me njerkën, Angela u përgjigj: “Shumë e vështirë!”
Ajo rrëfeu se si kur ishte vetëm 10 vjeçe, njerka e keqtrajtonte duke krijuar intriga, mashtrime e madje duke penguar edhe nënën e Angelës që ajo të bashkohej me të bijën në Zvicër.
Megjithatë, e vënë nën trysni nga kjo situatë, modelja rrëfeu se një gjë të tillë nuk ia tregoi kurrë të atit, derisa mbushi 18 vjeç.
E pyetur për marrëdhënien aktuale me të atin, Angela tregoi se tani ajo flet më të vetëm 1 ose dy herë në vit.