Policia greke ka arrestuar këtë të premte autorin e vrasjes së 41-vjeçarit Altin Arapaj në zonën e Rafinës. Autori është identifikuar nga mediat helene si Mikel Selimaj, 46 vjeç, me origjinë nga Vlora. Ai u gjet në një apartament të marrë me qira në Glyka Nera.
Ishte pronari i banesës që lajmëroi autoritetet pasi qiramarrësi nuk përgjigjej prej shumë orësh. Kur zjarrfikësit dhe policia kanë hapur derën ata kanë gjetur personin e shpallur në kërkim për vrasjen. Në makinën e tij u gjetën gjurmë gjaku dhe një gëzhojë. Autori u identifikua nga vetë viktima që para se të ndërronte jetë kishte telefonuar bashkëshorten duke i treguar edhe emrin e personit që e qëlloi.
Nga hetimet mësohet se viktima ishte takuar me autorin dhe dy shqiptarë të tjerë të shpallur në kërkim. Së bashku kishin udhëtuar deri në vendin ku ndodhi ngjarja. Policia është duke hetuar për motivet e krimit. Dyshimet janë për një prishje të pazareve nga përfshirja në aktivitete të paligjshme duke pasur parasysh se edhe viktima edhe autori kishin precedentë penalë në fushën e narkotikëve.