Edgardo Greco, një mafioz italian i dënuar për vrasje, i cili ishte në arrati që nga viti 2006, është arrestuar në Saint-Étienne, në Francë, ku ishte fshehur duke punuar si picier prej tre vitesh.
Greco ishte pjesë “Ndrangheta”. 63-vjeçari ishte në kërkim për vrasjen e dy vëllezërve gjatë një “lufte mafioze” mes dy bandave në fillim të viteve 1990.
Stefano dhe Giuseppe Bartolomeo u rrahën për vdekje në dyqanin e një shitësi peshku në qytetin e vogël të Kozencës në janar të vitit 1991. Trupat e tyre nuk u gjetën kurrë dhe besohet se janë tretur në acid. Greco ishte pjesë e një bande rivale dhe ai u akuzua gjithashtu për tentativën e vrasjes së një burri tjetër më vonë atë vit, në të njëjtin qytet.
Kapja e Greco është arrestimi i dytë i profilit të lartë mafioz nga autoritetet italiane brenda pak javësh.
Rasti tjetër ishte ai i Matteo Messina Denaro i cili ishte në arrati për 30 vjet, kur u ndalua gjatë një vizite në një klinikë në Siçili, raportoi BBC-ja të enjten.