Gjatë vizitës së tij në shkollën greke “Homeros”, në Himarë, ku studiojnë 146 fëmijë, Mitsotakis ka qenë i shoqëruar nga peshëngritësi Pirro Dhima.
Olimpisti nuk e fshehu gëzimin për këtë moment, të cilin ai e cilësoi si historik.
Gjatë fjalës së tij, kryeministri grek ftoi të flasë Pirro Dhimën, duke theksuar se ai “ka ngritur mbi kurriz gjithë Greqinë”.
Nga ana tjetër, gjatë fjalës së tij, Pirro Dhima u shpreh se edhe në “anën tjetër të botës” të ishte, do të vinte në këtë takim.
“Sot është një ditë shumë e rëndësishme. Nuk do të mungoja për asgjë. Është një ditë historike për Himarën dhe për të gjithë ne Himariotët. Faleminderit kryeministër për vizitën. Nuk do të mungoja për asgjë, do të vija nga ana tjetër e botës. Faleminderit shumë”, tha Pirro Dhima, njeriu që vite më parë fitoi medaljen e artë në peshngritje.
Më pas Mitsotakis foli me të pranishmit dhe pati entuziazëm, ndërsa u takua edhe me anëtarë dhe përfaqësues të minoritetit etnik grek në Shqipëri.