Ata janë një ndër çiftet më jetëgjatë të ekranit shqiptar, por edhe më simpatikë!
Julka dhe Andi e shfaqin shpesh herë dashurinë e tyre për njëri-tjetrin në rrjetet sociale, por deri më sot, nuk e dinim historinë e tyre të njohjes dhe sesi u lidhën më pas.
E ftuar në programin e mëngjesit “Ditë e Re” në TV Ora, Julka ka treguar se për herë të parë janë takuar në Top Albania Radio. Në atë kohë Andi shfaqi interes ndaj saj, por më pas u lidh me dikë tjetër thjesht sepse shoqja e Julkës i tha se kjo e fundit “nuk do t’ia varë kurrë”.
“Andi kishte pyetur për mua, megjithatë një mikesha ime i kishte thënë që Julka nuk do të ta varë kurrë. Edhe unë e pashë e me ra në sy, megjithatë Andi krijoi një lidhje me dikë tjetër dhe vitet kaluan. U desh të takoheshim disa vite më pas, kur unë Andin e pashë po prapë në ‘Top Albania Radio’, ai sapo ishte kthyer nga Italia. Ishte me një kapele, ku i dukeshin edhe sytë e bukur. Kësaj here ai ishte i vendosur dhe siç me tregon, kur më ka parë ka thënë: ‘Kjo është e duhura’”, shprehet Julka.
Që prej vitit 2001 ata janë lidhur dhe tani kanë edhe dy djem të mrekullueshëm së bashku, që kanë po ato sytë e bukur të babi Andit, pas të cilëve u dashurua mami Julka.
