Ministri i Mbrojtjes Pirro Vengu dhe homologu i tij në qeverinë e Kosovës ishin sot pranë forcave që vazhdojnë kërkimet për gjetjen e trupit të Jurgen Karajt, i cili u mbyt në lumin e Matit. Vengu falenderoi ministrin e Kosovës për ndihmën e dhënë dhe shtoi se gjetja e një dokumenti që Karaj kishte me vete shton shpresat për gjetjen e trupit të tij.
Prej 27 ditësh vijon operacioni i kërkimit për gjetjen e trupit të 30-vjeçarit Jurgen Karaj, i cili dyshohet se u rrëmbye nga rrjedha e lumit Mat më 10 janar, pas një aksidenti rrugor. Karaj po udhëtonte drejt banesës së tij së bashku me 24-vjeçarin Andi Losha, i cili arriti të shpëtonte dhe të dilte i gjallë nga mjeti.
Në operacionin e kërkimit janë angazhuar Forcat e Armatosura të Shqipërisë, si edhe Njësia Speciale e Forcave të Sigurisë së Kosovës. Për të ndjekur nga afër zhvillimin e operacionit, këtë të enjte në zonë ishin të pranishëm Ministri i Mbrojtjes i Shqipërisë, Pirro Vëngu, dhe Ministri i Mbrojtjes i Kosovës, Ejup Maqedonci.
Pas një takimi me familjarët e Jurgen Karajt, ministri Vëngu deklaroi se operacioni do të vijojë, i mbështetur edhe në një indicie të re të ditëve të fundit, konkretisht gjetja e një karte identiteti që 30-vjeçari e mbante me vete.
Ndërkohë, ministri i Mbrojtjes i Kosovës, Ejup Maqedonci, theksoi se ekipi special i FSK-së do të qëndrojë në krah të Forcave të Armatosura të Shqipërisë deri në përfundim të këtij operacioni.
Kërkimet për gjetjen e Jurgen Karajt po zhvillohen përgjatë gjithë rrjedhës së lumit Mat, si dhe në liqenin e Ulzës.
Postimi i Vengut:
Pranë familjarëve, në ditën e 27-të të operacionit të kërkim-shpëtimit për Jurgen Karaj, në zonat e Burrelit dhe Klosit.
Efektivë nga Shqipëria dhe Kosova janë shpërndarë në terren, duke mbuluar të gjithë basenin e lumit Mat, në një angazhim të pandërprerë dhe të koordinuar.
Forcat e Armatosura po kryejnë detyrën e tyre me përgjegjësi të plotë, pa më shumë e pa më pak se ç’kërkon misioni, ndërsa vlerësojmë dhe falënderojmë posaçërisht ndihmën dhe kontributin e efektivëve të FSK-së, në një frymë solidariteti dhe bashkëpunimi vëllazëror.
