Një ditë e mbushur me aktivitete ishte ajo e kandidatit socialist në Qarkun e Dibrës, Agron Malaj.
Nga mëngjesi deri në mbrëmje ai dhe Sekretari i Përgjithshëm i Partisë Socialiste Blendi Klosi janë takuar me strukturat lokale të PS-së Mat e Klos si dhe me zgjedhës të Burrelit e Gurrës.
Gjatë fjalës së tij kandidati Malaj tha se ka gjetur një mbështetje masive në të gjitha takimet e zhvilluara, në lagjet, fshatrat dhe qytetet e rrethit Matit.
Ai tha se rezultati i synuar 4-1 nuk është eufori elektorale, por një objektiv që mund të realizohet. Malaj shtoi se PD nuk gjen dot as komisionerë për qendrat e votimit, jo më të sigurojë vota në zgjedhjet e 11 majit. Kandidati u bëri thirrje votuesve, të lënë mënjanë bindjet politike dhe ta votojnë të gjithë, për të vijuar me investime të reja.
Numri dy i Partisë Socialiste tha gjatë takimeve me shtabet elektorale të PS Mat e Klos dhe në tubimet e zhvilluara në njësinë Gurrë dhe lagjen “Partizani” Burrel se nëse ruhet rezultati i zgjedhjeve të vitit 2023 në Qarkun e Dibrës, PS fiton katër mandate.
“Deri të dielën kërkohet angazhim maksimal i të gjitha strukturave të PS-së. Ne duhet të punojmë fort për t’i shtuar votat. Zgjedhësit duhen falenderuar për mbështetjen e dhënë në zgjedhjet e kaluara dhe t’u kërkohet t’na votojnë me 11 maj 2025. Në respekt të punës dhe përkushtimit të Agron Malaj duhet të punoni akoma më shumë, që fitorja të thellohet”, theksoi Klosi në Gurrë.
