Ish-ministrja e Mbrojtjes, Mimi Kodheli ka folur lidhur me çështjen e radarëve që u përmend nga kolegu i saj Saimir Tahiri gjatë seancës së tij gjyqësore.
E ftuar në “News24”, Kodheli tha se radarët në vend kanë filluar që të punojnë në dhjetor të po atij viti.
“Nuk është në këndvështrimin tim, do të jem pothuajse 100% afër realitetit. Sigurisht që është marrë vetëm një moment për sa jam informuar sepse zoti Tahiri ka folur gjatë për korrespodencën. Nuk më është dashur as letra e zotit Tahiri që daton tetor i vitit 2013, pra ne kishim vetëm një muaj që ishim futur në zyrë për të kuptuar që radarët nuk punonin sepse çështja e trafikimit të paligjshëm apo të mosfunksionimit të vrojtimit të bregdetit shqiptar ishte një nga shtyllat e luftës sonë politike kur ne ishim në opozitë me qeverinë e Sali Berishës…
Kështu që këto gjuajtjet nën brez, e ka njoftuar, ndërkohë që Mimi nuk e dinte apo korrespodenca nuk…duhet të jenë jashtë çdo diskutimi që është diskutuar sot në seancë me Saimir Tahirin. Besoj se këtu kam ezauruar edhe pyetjen tuaj”, tha Kodheli.