Pas një mungese prej disa muajsh, këtë të mërkurë është mbledhur Komiteti Teknik i Ekspertëve për pandeminë e Covid-19, të cilët nuk kanë vendosur masa kufizuese, por masa e vetme është ajo e thirrjes për vaksinimin dhe mbajtjes së maskës në ambiente të mbylluara.
Zv.ministrja e Shëndetësisë, njëherazi dhe kryetare e Komitetit të Ekspertëve, Mira Rakacolli tha se e vetmja masë që duhet marrë tani është vaksinimi, edhe pse ditët e fundit në vend janë rikthyer vdekjet dhe është parë një rritje e shifrave të të infektuarëve. “Për momentin, me këto shifra që kemi, nuk është rasti për të propozuar masa të tjera përveç vaksinimit”, tha Rakacolli.
Eugena Tomini, drejtoreshë e ISHP-së, tha se janë rritur rastet e reja. “Ka një rritje të rasteve pozitive ditore dhe të përqindjes së testimeve që rezultojnë pozitive. Popullata duhet të ndërgjegjësohet për vaksinimin. Covid ka treguar që nuk ka sezonalitet dhe është i pranishëm gjatë gjithë vitit”, theksoi Eugena Tomini.
Shefja e Infektivit, Najada Çomo, tregoi sesi paraqitet situata në spitalin Covid 3. “Janë persona të pavaksinuar, me vaksinë të lënë në mes dhe kryesish ato që kanë bërë vaksinimin e hershëm, bërja e dozës së tretë është e domosdoshme, grupmoshat më të prekura janë mbi 62% është mbi 60-70, ka masur edhe një 20-vjeçare”, tha Çomo.