Tashmë do të ketë një agjenci në varësi të ministrit përgjegjës për turizmin dhe mjedisin, që ka si mision të sigurojë koordinimin, me bashkitë, institucionet publike dhe partnerët ndërkombëtarë dhe që lidhet me në menaxhimin e integruar të mbetjeve.
Për herë të parë duket se do të ketë një agjenci shtetërore që i shërben ekonomisë qarkulluese dhe që siguron menaxhimi e mbetjeve sipas të gjitha standardeve të njohura bashkëkohore, që nga grumbullimi, ndarja në burim, riciklimi e të tjerë sipas ligjit përkatës për menaxhimin e integruar të mbetjeve.
Vendimi i ri i qeverisë iu jep përgjigje edhe një serë çështjesh mjaft të debatueshme të sotme që lidhen edhe me incenerimin e mbetjeve dhe zbatimin e masterplanit kombëtar të menaxhimit të integruar të mbetjeve dhe strategjisë sektoriale për mbetjet.
Në gjithë këto vite ka pasur nisma të rëndësishme si ato për ndarjen në burim të mbetjeve por asnjëherë pushteti vendor dhe ai qendror nuk kanë mundur të realizojnë këtë proces, edhe për shkak të një kulture të munguar të qytetarëve apo edhe traditës së munguar të kësaj lloj sjelljeje.
Edhe financimet e huaja për projekte pilot për këtë qëllim nuk kanë mundur ta ndryshojnë këtë historik që ka sjellë problematika jo vetëm mjedisore dhe dëmtim të imazhit në turizëm, por edhe fonde të shkuara dëm, nëse do të vihej në funksionim ekonomia qarkulluese.
Ky vendim hyn në fuqi pas botimit në “Fletoren Zyrtare”.