Kryebashkiaku i Matit Agron Malaj tha sot në mbledhjen e Këshillit të Sigurisë se situata e krijuar nga pandemia është shqetësuese, ndaj institucionet përgjegjëse duhet të marrin të gjitha masat për parandalimin e Covid-19.
Malaj nënvizoi se është konstatuar se persona të infektuar lëvizin në vende publike, lokale, tregje, rrugë, farmaci, sheshe, etj, duke krijuar premisa për infektimin e qytetarëve.
“Duam të dalim në ajër të pastër, është justifikimi i të infektuarve”, tha Malaj. Kjo nuk duhet të ndodhë. Policia e Shtetit dhe institucione të tjera duhet të jenë të vendosur për karantinimin e këtyre personave, sidomos kur ato janë në vende pune ku mund ta përhapin koronavirusin.
Mësohet se do të angazhohet edhe Policia Bashkiake për evidentimin e personave që shkelin rregullat e karantinimit dhe në bashkëpunim me Policinë e Shtetit do të merren masa administrative dhe ligjore.
Sipas kryetarit të Bashkisë Agron Malaj administratorët dhe shërbimi social do të marrin të gjitha masat që personave të prekur t’u shërbehet në banesë. Aktualisht në Bashkinë e Matit janë aktiv me Covid-19 82 persona.
