Partia Demokratike fitoi pjesërisht në Gjykatën Kushtetuese betejën kundër mazhorancës socialiste për ligjin e ri të komisioneve hetimore. Gjyqtarët pranuan dy prej kerkesave kryesore të PD-së lidhur me marrjen e provave dhe zhvillimin e mbledhjeve të hapura për publikun. Gjykata Kushtetuese vendosi se “vendimi i ndërmjetëm për refuzimin e provave duhet të jetë përjashtim nga rregulli i përgjithshëm, sipas të cilit provat e kërkuara nga pakica parlamentare duhet të merren.” Kjo vendosje rrezon nenin që kërkonte votën e shumicës së anëtarëve të komisionit, në praktikë, votën e partisë në pushtet për çdo provë apo deshmitar të ri.
Gjithashtu, gjykata shfuqizoi nenin që lejonte zhvillimin e mbledhjeve pa praninë e publikut. “Gjykata arriti në përfundimin se, si rregull, veprimtaria e komisionit hetimor duhet të jetë publike dhe vetëm përjashtimisht ajo mund të zhvillohet me dyer të mbyllura, kur të drejtat e njeriut prevalojnë në raport me të drejtën për informim,” theksohet në vendimin e gjykatës kushtetuese.
