Nënprefekti i Matit Hasan Pasha botoi këto ditë librin “Fisnikët e Matit”, i cili u kushtohet disa prej figurave të njohura të kësaj krahine. Gazetarë, diplomatë, doktorë shkencash, agronomë, mjekë, stomatologë, poetë, shkrimtarë, këngëtarë, instrumentistë, inxhinierë, pushtetar lokal, ekonomistë, etj, janë portretizuar nga autori me profesionalizëm.
“Gazetari i njohur i medias së shkruar dhe vizive, Hasan Pasha, autor i shumë shkrimeve nëpër gazeta e portale, si dhe i vëllimit publicistik “Të pathënat e tridhjetë viteve”, për botim të ri zgjodhi monografinë “Fisnikët e Matit”, kushtuar njerëzve që kanë kontribuar me mendje, zemër dhe krah për vendlindjen, atyre që ai i ka njohur vetë, specialistë të fushave të ndryshme, “intelektualët e shekullit të ri”, burra e gra që kanë dhënë më shumë se sa kanë marrë nga Mati”, shprehet kryetari i Klubit Letrat “Penda Budi” Mat, Hamdi Hysuka, në parathënien e librit.
Përzgjedhja dhe renditja e personazheve që përfshihen nëpër faqet e kësaj monografie është bërë sipas kritereve të moshës e profesioneve. Ata vijnë nga gjithë territori gjeografik i Matit dhe përtej tij: nga Shëlliu, Macukulli, Derjani, Lami i Madh, Rremulli, Mirdita, Laç-Bruçi, Burreli, Zenishti, Lisi, Batrra, Kurdaria, Klosi, Karica, Bazi, Urxalla, Xibri, Gurra, Komsia… nga Martaneshi, Bulqiza, Belshi i Elbasanit, Erseka e Kolonjës, Gjirokastra, Vlora… Numri 78 i këtyre personaliteteve nuk është fundor. Ka dhe të tjerë, për të cilët mund të shkruhet në vazhdim nga autori, apo autorë të tjerë, pa u bazuar në bindje politike, as paragjykime. E shkruar nga pena e gazetarit Hasan Pasha, nëpërmjet njohjeve vetjake dhe dokumentave, monografia “Fisnikët e Matit”, është vepër e veçantë për komunitetin matjan, dhe i shërben lexuesit të interesuar. Karakteristikë e botimit është publicistika e autorit, e cila për kulturën, traditat, historinë dhe personalitetet e Matit sjell vlera njerëzish.
Veçori e personaliteteve në fjalë është ideali dhe përkushtimi i tyre me devotshmëri aty ku kanë jetuar e punuar. Disa nga ata, për punë të palodhur, janë vlerësuar me tituj nderi. Stadi i sotëm i zhvillimit ka e do të nevojë për personalitete si Ymer Minxhozi, Qamil Xhika, Rexhep Klosi, Agim Cevani, Dilaver Kurti, Ymer Neli, Feride Kurti, Tahir Tahiraj, Ramiz Fiçorri, Sefer Duka, Sali Kurti, Nedin Hoxha, Sabri Aliaj… disa prej të cilëve kanë ndërruar jetë, të tjerët gëzojnë moshën e tretë dhe pjesa tjerër janë në marrëdhënie pune.
