Mbreti Zog vendosi zyrtarisht monarkinë në Shqipëri më 1 shtator të 1928. Pas saj nisën përpjekjet për të vendosur jetën e shoqërise dhe veprimtarinë e shtetit shqiptar mbi baza ligjore kushtetuese, duke plotësuar legjislacionin e periudhës republikane.
Zogu kishte urdhëruar që të gjitha dikasteret të ngrinin komisione të posaçme për të hartuar Ligjin Organik të tyre, i cili bashkë me buxhetin financiar do të miratohej nga Këshilli i Ministrave me 1 janar 1929 dhe do të kalonte më pas për aprovim në parlament.
Ministria për Europën dhe Puënt e Jashtme ka publikuar në arkivën e saj online këtë ligj të 25 prillit 1929, që përkon dhe me 90-vjetorin e hyrjes në fuqi të ligjit më jetëgjatë për sa i përket shërbimit të jashtëm të Shqipërisë.
Komisioni i Posaçëm i ngritur në Ministrinë e Punëve të Jashtme, i drejtuar nga Ministri i Punëve të Jashtme, në fillim Iliaz Vrioni e më pas Rauf Fico, punoi mbi projektin që kishte nisur të hartohej që gjatë periudhës së Republikës Shqiptare, duke e pasuruar me elementët që i shkonin një rregjimi monarkik dhe duke u mbështetur në modelet më të mira perendimore që kishin arritur të siguronin legatat apo konsullatat shqiptare jashtë vendit. Ministria e Punëve të Jashtme e dërgoi këtë projektligj në Këshillin e Ministrave me 15 dhjetor 1928. Më pas projektligji do të kalonte në Dhomën Legjislative.
Pasi u miratua në Parlament, Ligji Organik u dekretua nga Mbreti Zog me 25 prill 1929 dhe hyri në fuqi me botimin në Fletoren Zyrtare, nr.27, dt.8 maj 1929.
Ligji ishte dokumenti baze i shërbimit diplomatik, i cili nuk u zëvendësua nga një ligj tjeter i ngjashëm gjatë 70 viteve pasardhëse të veprimtarisë së Ministrisë së Punëve të Jashtme.
Ligji përbëhet nga 8 kaptina (kapituj) dhe është mjaft kompleks për nga tërësia e komponentëve dhe problematikave që ai trajton, profesionalizmi që ai synon të ndërtojë në radhët e shërbimit të jashtëm, përcaktimi i qartë i detyrave, funksioneve dhe ndërtimi i përgjithshëm i këtij dikasteri.
Miratimi ë këtij ligji u shoqërua me miratimin në Parlament edhe të Ligjit mbi Shërbimin Konsullor, si dhe Rregulloren e Përgjithshme të Ceremonive Zyrtare të shtetit shqiptar, duke krijuar një kuadër të plotë ligjor për zhvillimin e konsolidimin e funksionimit të shërbimit të jashtëm shqiptar.
Dokumentin e plotë mund ta lexoni këtu.