Në Abu Dhabi po zhvillohet samiti i “Forbes 2025”. Revista e njohur amerikane ka njoftuar edhe pjesëmarrjen e bashkëshortes së kryeministrit shqiptar, Linda Rama. Ekonomiste dhe avokate për të drejtat, Linda Rama bisedoi me Mika Brzezinski mbi temën ”Fuqia pas Progresit”.
Bashkëshortja e kryeministrit ka theksuar që problemi më i madh që trashëgoi komunizmi nuk ishte varfëria, por traumat sociale. ”Pas kaosit dhe pasigurisë të vitit 1991 nga rënia e sistemit, mësimet më të mëdha i nxorëm nga pësimet dhe të mësosh nga pësimet është e dhimbshme dhe e kushtueshme”, u shpreh ajo.
”Në tranzicionin tonë nuk kemi qenë vetëm, bota demokratike ka qenë dhe është me ne. Shqiptarët dhe Shqipëria ja kanë dalë sot të ulen në tryezën e negociatave për anëtarësim në Bashkimin Europian. Jemi vendi me rritjen më të madhe të turizmit në Europë. Vizitoni Shqipërinë. Nëse vini një herë, e dimë që do të na vizitoni përsëri”, tha Rama.
Ajo e mbylli fjalën e saj me ftesën për të vizituar Shqipërinë. ku vendi ka rritje të turizmit. Të ftuar në samit mësohet se janë edhe personalitete të politikës, artit, shoqërisë civile, biznesit nga të paktën 50 vende të botës.