Këtë të premte filloi procesi gjyqësor për rastin e Liridona Ademajt, e cila u vra më 29 nëntor 2023. Të akuzuar janë bashkëshorti i viktimës Naim Murseli si dhe Granit Plava, Kushtrim Kokalla dhe Tomë Dodaj. Dodaj ka shitur armën me të cilën është kryer vrasja, ndërkaq aktgjykimi ndaj tij është shpallur nga gjykatësja Fatime Dërmaku.
Tomë Dodaj është dënuar me 5 vite burg dhe 5 mijë euro gjobë, pasi ka pranuar fajësinë për shitjen e armës së përdorur në vrasjen e Liridona Ademajt. Avokati Agron Kuqi tha se dënimi do apelohet në Gjykatën Supreme.
Të akuzuar për vrasjen e 30-vjeçares janë bashkëshorti i saj Naim Murseli, Granit Plava dhe Kushtrim Kokalla. Naim Murseli ka deklaruar para trupit gjykues se ndihet plotësisht i pafajshëm.
I akuzuari Granit Plava ka zgjedhur të mbrohet në heshtje, kurse Kushtrim Kokalla ka thënë se nuk deklarohet rreth fajësisë pa u konsultuar më avokatin e tij. Më 15 janar të këtij viti, Prokuroria Themelore në Prishtinë njoftoi se kishte ngritur aktakuzë për vrasjen e 30-vjeçares Ademaj.