Kompanitë që u denoncuan nga LSI-ja për aferën e inceneratorëve, kanë pezulluar aktivitetin e tyre me urdhër të SPAK-ut. Hetuesit kanë kërkuar pezullimin e aktiviteteve, ku referuar të dhënave në QKB, aktiviteti i tyre është pezulluar ditën e sotme.
Pak ditë më parë, Ministria e Financave dhe Ekonomisë pranoi se skemat e mashtrimit me tatimin mbi vlerën e shtuar të denoncuara nga Lëvizja Socialiste për Integrim janë të vërteta dhe se kanë qenë vetë tatimet që i kanë referuar në prokurori në vitin 2018.
Delina Ibrahimaj tha se janë denoncuar 20 kompani fiktive që prisnin fatura për punë të pakryera, dhe se faturat janë blerë nga 197 firma, mes të cilave edhe kontraktorë të inceneratorëve.