Pas e-Albania, Irani “shkatërroi” edhe sistemin TIMS që la me mijëra udhëtarë në pritje dhe në kaos në mbarë doganat e vendit. Ekspertët po e cilësojnë sulmet kibernitike si “luftën e shekullit”. Drejtori i Sigurisë në AKSHI, Enis Ylli ka paralajmëruar se mund të ndodhin sulme të tjera kibernetike në sektorë të tjerë, pas atij të e-albania dhe sistemit TIMS.
“Duhet të dimë që duhet të qëndrojmë në alarm. Nuk është vetëm sektori bankar por edhe sistemi zgjedhor, energjetika dhe gjithçka që na prek në përditshmërinë tonë se qëllimi është krijimi i destabilitetit në vend. Kjo është luftë që do vazhdojë ne duhet të mësohemi me ekzistencën e saj”.
Po ashtu Ylli thekson se duhet investuar më shumë në monitorim, ndërsa ai vlerëson edhe mbështetjen e partnerëve ndërkombëtarë. Ishte SHBA-ja ajo që menjëherë reagoi ndaj Iranit me sanksione.
“Që të kuptohet rëndësia e sulmeve kibernetike që është lufta e shekullit 21. Ne kemi kërkuar vazhdimisht dhe jemi mbështetur. Ajo që duhet investuar është pjesa e monitorimit. 7 miliardë dollarë ka investuar Irani në hakerim, Shqipëria e ka buxhetin sa gjysma e kësaj shume. Ne po bëjmë analizim të situatës për t’ju përgjigjur në përpjestim të drejtë riskut. Deri në këto momente siguria që kemi vendosur është në përpjestim me riskun tonë, nëse ky risk do të rritet do të kërkojë analizim dhe fokusim më të madh në sigurinë kibernetike të Shqipërisë”.