Presidenti francez, Emmanuel Macron, do të takohet javën e ardhshme me homologët rus dhe ukrainas Vladimir Putin dhe atë ukrainas Volodimir Zelenski.
Mediat e huaja raportojnë se lideri i shtetit francez do të shkojë në Rusi ditën e hënë, ndërsa të enjten udhëton drejt Kievit.
Këto takime do të zhvillohen në kuadër të zgjidhjes së konfliktit mes Perëndimit e Ukrainës dhe Rusisë. Macron ka bërë thirrje për ulje të tensioneve mes palëve si dhe ka biseduar në telefon me Putin dhe Zelenskin, por edhe me presidentin amerikan Joe Biden.
Ditët e fundit, kryeministri britanik Boris Johnson dhe presidenti turk Rexhep Taip Erdogan vizituan Ukrainën me qëllim inkurajimin e Kievit për të shpëtuar nga sulmi dhe pushtimi i mundshëm nga Rusia. Pritet që dhe kancelari i ri gjerman Olaf Scholz të udhëtojë drejt Moskës për të bindur Putinin që të heqë dorë nga kërcënimet ndaj Ukrainës. Erdogan ka premtuar se është gati të mbajë një samit 3-ditor bisedimesh mes Putin dhe Zelenskit në Ankara.
Presidenti Emmanuel Macron u takua për herë të fundit me homologun rus në vitin 2019 në jug të Francës. Vizita e planifikuar në Moskë e presidentit francez u anullua për shkak të pandemisë.