Partia Socialiste në Bashkinë e Matit ka nisur takimet me strukturat e saj në 8 Njësitë Administrative, duke synuar thellimin e fitores në zgjedhjet e 14 majit.
Bashkëkryetarët e OS-vë, të deleguarit, mbështetësit e PS-në vazhdojnë takimet me çdo votues për t’i bindur ata se investimet e mëdha që kanë nisur në të gjithë territorin e Matit duhet të vazhdojnë edhe pas zgjedhjeve lokale.
I pranishëm në mbledhjet e strukturave socialiste të lagjes “Pjetër Budi” Burrel, kryebashkiaku Agron Malaj ka kërkuar mbështetjen e çdo matjani për të vijuar punët e mira dhe për t’u shërbyer qytetarëve me përkushtim, ndershmëri e transparencë.
“Unë kërkoj ndihmën tuaj për të vazhduar punët e nisura dhe për të mundësuar të tjera investime në Bashkinë e Matit, është shprehur Malaj. Modeli i atyre që kanë qeverisur më herët Matin ka dështuar. Ne kemi ndërtuar tjetër model qeverisje lokale. Modeli ynë meriton të mbështetet. Ndryshimet në qytetin e Burrelit dhe 7 Njësitë Administrative do të jenë të prekshme dhe serioze”, ka argumentuar Agron Malaj.
Jo vetëm antarët e PS-së, por edhe qytetarët e Matit kanë shprehur gatishmërinë e tyre për ta mbështetur kryetarin e bashkisë Agron Malaj për një mandat të dytë, duke përmenduar investimet e mëdha që po realizohen pas 33 vitesh në këtë njësi vendore.