Tri ditë më radhë po organizohen aktivitete në nderim të 31 Korrikut të vitit 1943 në qytetin e Burrelit. Pardje në sheshin “Kastrioti” u mbajt një koncert i veçantë ndërkohë dje pati ceremoni zyrtare.
Pranë muzeut historik Mat, te memoriali i luftës, u vendosën kurora me lule nga autoritetet lokale. Pjesmarrësit vizituan sakaq pavionet e Muzeut të rrethit.
Në lulishten “Geraldinë” u bë hapja e panairit artizanal, bujqësor, blektoral me pjesmarrës të ardhur jo vetëm nga Mati por edhe nga Dibra e Mirdita.
Për të parë nga afër panairin ishte Kryetari i Bashkisë Mat, Agron Malaj, shoqëruar nga deputetja Aurora Mara, Prefekti i Qarkut Dibër, Nexhbedin Shehu, nënprefekti i Matit Hasan Pasha etj.
Kryebashkiaku Malaj tha se se aktivitetet në nderim të kësaj ngjarje të shënuar do të vijojnë edhe me datën 1 Gusht.
Malaj tha para qytetarëve se me 31 korrik 1943 matjanët u mblodhën së bashku dhe vendosën të sulmojnë pushtuesit e huaj. Si asnjëherë dhe si askund tjetër mbi 3000 burra matjanë sulmuan dhe shkatërruan garnizonin fashist në Komsi.
Prefekti i Qarkut Dibër, Nexhbedin Shehu tha se kryengritja e 31 Korrikut të vitit 1943 është një ngjarje e madhe jo vetëm për Matin por gjithë Shqipërinë.
Veç panairit, pati edhe aktivitete për fëmijë si shfaqje e Teatrit të Kukullave për fëmijë nga trupa e Teatrit Kombëtarë si dhe performancë cirku. Aktivitetet e ditës së sotme do të mbyllen në mbrëmje me koncertin festiv të Ansamblit të Matit.