Punimet në ujësjellësin e Zallë Gjoçajve vijojnë me ritme të shpejta megjithëse terreni është i thyer, në zonën malore të Matit.
Ky investim është premtuar prej vitit 1990 nga dhjetra kandidatë për deputetë e kryetarë bashkie në këtë trevë, por kjo vepër e rëndësishme për banorët e Derjanit, Macukullit e Rukajve është drejt finalizimit vetëm vitet e fundit.
Tubacionet dhe depot e ujit janë ndërtuar në disa fshatra dhe aktualisht po punohet në linjën kryesore, nga vepra e marrjes drejt depove të fshatrave, si dhe linja drejt depos së Lisit, nga ku furnizohen konsumatorët e qytetit të Burrelit.
Kryebashkiaku i Matit Agron Malaj në një postim në rrjetin Facebook shprehet se në këtë objekt vijojnë investimet sipas parashikimeve.
Postimi i Agron Malaj:
Ujësjellësi i 3 Njësive Administrative Derjan, Macukull, Rukaj, vijon të ndërtohet sipas parashikimeve.
Në fund të implementimit të këtij projekti 17 fshatrat e këtyre njësive do të kenë të zgjidhur njëherë e mirë problemin e furnizimit me ujë të pijshëm!
