Ministri i Shtetit për Pushtetin Vendor, Arbjan Mazniku ka prezantuar sot dy nisma të rëndësishme gjatë mbledhjes së Këshillit Konsultativ. Ai informon se nisma e parë kishte të bënte me disa propozime për ndryshimin e ligjit “Për Bashkëpronësinë”, me qëllim përmirësimin e mënyrës së mirëmbajtjes së ambienteve të përbashkëta në ndërtesat e banimit.
Sipas propozimit, bashkitë do të kenë një rol më aktiv, duke urdhëruar inspektime të ndërtesave dhe duke vendosur tarifa mirëmbajtjeje nëse bashkëpronarët nuk arrijnë një marrëveshje.
Nisma e dytë vjen pas detyrës së përcaktuar në mbledhjen e përbashkët mes Qeverisë dhe Bashkive në Shkodër, që parashikon krijimin e një platforme online për kryetarët e Bashkive. Mazniku njoftoi se platforma tashmë është gati dhe mbledhja e parë do të zhvillohet së shpejti.
Postimi i plotë
Në Këshillin Konsultativ sot prezantuam dy nisma shumë të rëndësishme për pushtetin vendor. E para është propozimi për ndryshimin e ligjit “Për Bashkëpronësinë”, duke përmirësuar ndjeshëm mënyrën se si duhet të mirëmbahen ambientet e përbashkëta.
Bashkitë do të kenë një rol më aktiv në këtë proces. Kompetenca e tyre do të përfshijë urdhërimin e inspektimit të ndërtesave me iniciativë të vetën. Bashkia mund të caktojë edhe tarifat e mirëmbajtjes nëse bashkëpronarët nuk bien dakord.
Nisma tjetër ishte detyra që u la në mbledhjen e përbashkët mes Qeverisë dhe Bashkive në Shkodër. Lançimi i një platforme ku në mënyrë periodike Kryetarët e Bashkive të diskutojnë online me përfaqësues të kabinetit qeveritar për të bashkërenduar punën mes tyre dhe për të folur mbi problematikat që kërkojnë bashkëpunim midis këtyre dy pushteteve për t’u zgjidhur. Kjo platformë tashmë është gati dhe së shpejti do të zhvillojmë edhe mbledhjen e parë.