Mblidhet Këshilli i Lartë Gjyqësor, diskuton përfundimin e mandatit të Ardian Dvoranit

Këshilli i Lartë Gjyqësor po diskuton sot në mbledhjen e radhës çështjen e mbarimit të mandatit të kreut të KED, Ardian Dvorani, si gjyqtar në Gjykatën e Lartë. Mësohet se relatorja e çështjes Marcela Shehu gjatë seancës u shpreh se qendrimi në detyrë mbi afate cenon dhe vë në rrezik parimet e kushtetutës. Ndërsa anëtari tjetër Alban Toro ka deklaruar se Këshilli duhet të shprehet, të konstatojë mbarimin e detyrimit të Dvoranit për të qëndruar në Gjykatën e Lartë. Sakaq edhe Brikena Ukperaj është shprehur kundër largimit të Dvoranit, duke theksuar se detyrimi i tij për të qëndruar në Gjykatën e Lartë nuk ka mbaruar. Sipas Ukperajt, në asnjë dispozitë nuk gjen parashikimin që Dvorani do të zëvendësohet nga një anëtarë i dytë apo i tretë. Kujtojmë që dje dy misionet e Bashkimit Europian dhe të Shteteve të Bashkuara të Amerikës EURALIUS dhe OPDAT kanë refuzuar të japin opinion e tyre lidhur me konfliktin ligjor, pasi sipas tyre kjo çështje është përgjegjësi ekskluzive e Këshillit të Lartë Gjyqësor.