Vendimi i qeverisë për të bllokuar TikTok-un ka sjellë një efekt të kundërt, duke nxitur një rritje të ndjeshme të kohës së qëndrimit në këtë platformë nga shqiptarët. Vetëm pesë ditë pas shpalljes së bllokimit, numri i përdoruesve aktivë është trefishuar, duke e bërë TikTok-un edhe më të popullarizuar se më parë.
Sipas ekspertëve të IT-së, ky vendim ka shkaktuar një rritje të interesit për këtë rrjet social, jo vetëm nga përdoruesit e rregullt, por edhe nga ata që më parë nuk kishin një llogari. Një efekt anësor i kësaj mase ka qenë rritja e shkarkimeve të aplikacioneve VPN, të cilat mundësojnë hyrjen në TikTok edhe pas bllokimit.
Eksperti i IT-së, Tomi Kallaxha, deklaroi: “Duke qenë se është folur kaq shumë për VPN-të, njerëzit janë intriguar dhe kanë kërkuar mënyra për të aksesuar TikTok-un, i cili është bllokuar nga kompanitë telefonike. Në top dhjetë aplikacionet më të shkarkuara aktualisht, gjashtë prej tyre janë VPN, ndërsa TikTok mban vendin e dhjetë. Vetëm gjatë muajit mars, numri i përdoruesve është rritur me 60 deri në 80 mijë.”
Por TikTok nuk është e vetmja arsye pse shqiptarët po përdorin më shumë telefonat dhe rrjetet VPN. Sipas të dhënave, ata janë duke kërkuar gjithashtu informacion mbi edukimin, sportin, bastet online të palejuara dhe serialet televizive.
“Një fjalë kyçe shumë interesante që është vënë re në kërkime është se vajzat po kërkojnë informacion mbi profesionet më të mira në teknologjinë e informacionit. Gjithashtu, është rritur shkarkimi i serialit ‘Adoleshenca’, ndërsa futbolli dhe bastet online vazhdojnë të jenë në krye të preferencave,” shtoi Kallaxha.
Megjithëse ekspertët e IT paralajmërojnë për rreziqet që vijnë nga përdorimi i VPN-ve, përfshirë rrezikun e hakerimit dhe keqpërdorimit të të dhënave personale, kjo nuk duket se ka ndikuar në vendosmërinë e shqiptarëve për të vazhduar aksesin në TikTok. Dëshira për argëtim dhe për të qenë të lidhur me rrjetin social ka triumfuar mbi shqetësimet për sigurinë kibernetike.