Në ndeshjen e fundit të kampionatit, klubi i Kukësit surprizoi të gjithë opinionin sportiv teksa vendosi që biletat e takimit ndaj Partizanit të kishin një çmim prej 1000 lekë të reja. Një çmim që duhet thënë se është i konsiderueshëm kur vjen puna te një biletë në kategorinë superiore.
Megjithatë, edhe pse tifozët e Partizanit sakrifikuan për skuadrën e zemrës duke parë se ekipi kishte një sfidë delikate për fatet e kampionatit, e kundërta ndodhi me tifozët kuksiane të cilët vendosën të bojkotonin çmimet e vendosura nga klubi, dhe kjo ishte lehtësisht e vërtetueshme nga tribunat e zbrazura të stadiumit “Lorio Boriçi”.
Ndërkohë, tashmë Kukësi do të kthehet të luajë të mërkurën për Kupën e Shqipërisë përballë Teutës. Dhe në këtë ndeshje verilindorët kanë marrë vendimin që hyrja për tifozët të jetë e lirë, pa pagesë. Një kontrast i madh nga ndeshja e kaluar, pasi nëse në rastin e parë klubi u justifikua se duhet të mbulonte shpenzimet e të luajturit në Shkodër, mesa duket në Elbasan, Kukësi luan falas, pasi këtë herë tifozët nuk do të mendojnë për të mbuluar shpenzimet e stadiumit.