The Weeknd ka ndryshuar emrin artistik në rrjetet sociale dhe është kthyer në emrin e tij të vërtetë, Abel Tesfaye. Ai muajin e kaluar i ka pyetur fansat në Twitter për mendimin e tyre për këtë ndryshim në karrierën e tij.
Ndryshimi i emrit vjen pasi fituesi i shumë çmimeve tha për mediat se nuk dëshiron të njihet nga emri i artit. Ai më parë është shprehur se e mori pseudonimin si adoleshent kur la shkollën një fundjavë dhe nuk u kthye më.
Tesfaye nuk ka treguar pse ka bërë ndryshimin, por ai ka folur për shtypin për serialin e tij të ardhshëm, “The Idol”.
“Po shkoj në një vend dhe një kohë ku po përgatitem për të mbyllur kapitullin Weeknd. Unë ende do të bëj muzikë ndoshta si Abel, ndoshta si The Weeknd. Por unë ende dua ta vras The Weeknd. Dhe do ta bëj. Përfundimisht. Patjetër që po përpiqem ta heq atë lëkurë dhe të rilind”.
Edhe pse është duke punuar për një album, ai zbuloi se mund të jetë i fundit i tij si The Weeknd.
“Kjo është diçka që duhet të bëj. Si The Weeknd, kam thënë gjithçka që mund të them.”