Kreu i Partisë së Lirisë, Ilir Meta kërkon anulimin e rritjes së akcizës për prodhuesit e birrës dhe verës, me argumentin se rrit papunësinë.
Po ashtu, ish-presidenti ka renditur disa propozime që do të prezantohen në vijim nga Partia e Lirisë, duke nisur që nga rritja e pensioneve e deri te heqja e TVSH-së për imputet bujqësore.
“Rritja e çmimeve ka vijuar të jetë e lartë dhe do të jetë edhe më e lartë. Rritja e pensioneve është mëse qesharake, një rritje prej 0,7 %, as një kafe në ditë. Familjet e varfra janë zhytur më thellë në varfëri. Po kështu buxheti i Ministrisë së Arsimit është ulur nga 2.2 që ishte vitin e kaluar, në 2.1 të Prodhimit të Brendshëm Bruto. Në kërkojmë anulimin e rritjes së akcizës së verës dhe birrës, pasi rrit papunësinë. Kjo rritje e akcizës bien në kundërshtim edhe me direktivat e bashkimit Evropian. Kërkojmë mos rritjen e barrës fiskale në këtë periudhë pasi rëndon mbi bizneset dhe qytetarët. Njëkohësisht anulimi i amendamentit për vendosjen e gjobave 10 fish, pasi është në kundërshtim me parimin e proporcionalitetit. Mbështetje financiare për studentët me 100 euro në muaj, aq sa marrin edhe bashkëmoshatarët e tyre në Kosovë. Mbështetje për kërkimin shkencor, Pasi është parashikuar një nivel i papërfillshëm prej 0,05 %. Do të kërkojmë rritje të pagës për pedagogët dhe mësuesit. Do të kërkojmë pajisje me librat falas për nxënësit. Heqje të TVSH për imputet bujqësore.”
Meta ka paralajmëruar protesta të tjera. Në fjalën e tij gjatë mbledhjes së kryesisë së PL-së, ai deklaroi se skandalet e kësaj qeverie nuk kanë të sosur, ndaj nuk mjaftojnë vetëm denoncimet, por organizime masive.