TURQI- Ministri i Jashtëm rus Sergei Lavrov do të vizitojë Turqinë të hënën për të diskutuar bisedimet e fundit të vendit të tij me zyrtarët amerikanë për përfundimin e luftës në Ukrainë dhe se si Ankaraja mund të kontribuojë në proces.
“Turqia, anëtare e NATO-s, e cila priti negociatat fillestare midis Rusisë dhe Ukrainës muaj pas fillimit të luftës në vitin 2022, është gati të marrë këtë rol në periudhën e ardhshme”, tha burimi i Ministrisë së Jashtme turke.
Vizita e Lavrov përkon me tre vjetorin e pushtimit të plotë të Ukrainës nga Rusia. Burimi shtoi se Lavrov dhe homologu i tij turk Hakan Fidan do të diskutojnë gjithashtu armëpushimin në Gaza dhe situatën në Siri, ku Turqia do të theksojë nevojën për unitet territorial sirian dhe dëbimin e terroristëve.
Negociatorët amerikanë dhe rusë u takuan në Riad javën e kaluar për të diskutuar përfundimin e konfliktit në Ukrainë, pa pjesëmarrjen e Kievit. Në të njëjtën ditë, presidenti ukrainas Volodymyr Zelenskiy u takua me presidentin turk, Tayyip Erdogan në Ankara.
Burimi turk tha se palët të hënën do të diskutojnë hapat drejt “një paqeje të drejtë dhe të qëndrueshme nëpërmjet përpjekjeve diplomatike, kontakteve të fundit midis SHBA dhe Rusisë dhe kontributet që Turqia mund të japë në proces”. Turqia është përpjekur të balancojë lidhjet e mira me Ukrainën dhe Rusinë, fqinjët e saj në Detin e Zi, gjatë gjithë luftës.