Në Serbi nuk do të tolerojnë kurrë që Shqipëria e madhe të krijohet. Nëse bëhet, do të ndodhë kur Serbia të jetë e shkatërruar dhe e mundur. Këtë e tha vetë ministri serb i Mbrojtjes, Aleksandar Vulin, që u shpreh se nëse bashkohen shqiptarët do të ketë luftë.
Ministri tha sot se disa herë ka kërkuar nga presidenti i Serbisë Aleksandar Vuçiç që ta shqyrtojë politikën ndaj Bashkimit Evropian dhe që Serbia duhet ta ndryshojë pozicionin e vet ndaj BE-së nëse Evropa nuk do ta ndalojë krijimin e Shqipërisë së madhe.
“Këtë e kam kërkuar disa herë dhe ai kurrë nuk më ka përkrahur. Edhe tani kërkoj që të mendojmë nëse na duhet një BE e tillë dhe një politikë e tillë. Kjo natyrisht se varet nga ai. Evropa dhe tërë bota po heshtin ndaj formimit të Shqipërisë së madhe. Shqipëria e madhe nuk mund të krijohet e të mos shkaktojë konflikte në Ballkan, jo vetëm me Serbinë e jo vetëm me serbët. Kryeministri shqiptar tashmë ka paralajmëruar se dëshiron t’i fshijë kufijtë me Malin e Zi, Maqedoninë e Greqinë dhe porosit se kudo që jetojnë shqiptarët nuk do të ketë kufij ndërmjet tyre. Kështu formohet Shqipëria e madhe”, tha Vulin.