Pas reshjeve intensive që shkaktuan përmbytje me dëme në disa qarqe, qeveria po lëviz me shpejtësi për përballimin e sezonit të dimrit. Ministrja e Punëve të Brendshme, Albana Koçiu, thirri sot në një takim koordinues të gjitha hallkat e sigurisë dhe menaxhimit civil, përfshirë Ministrin e Mbrojtjes Pirro Vengu, Ministrin e Pushtetit Vendor Ervin Demo, si dhe 12 prefektët e qarqeve.
Mesazhi i Koçiut ishte që tani kërkohet gatishmëri maksimale. Në fokus të takimit ishte roli i prefektëve, të cilët ministrja i cilësoi si drejtuesit kryesorë të operacioneve në terren. Ajo u kërkoi atyre braktisjen e raporteve burokratike dhe kalimin në veprime konkrete. Brenda një kohe të shkurtër duhet të përmbyllet bilanci i dëmeve të shkaktuara nga reshjet e fundit, si dhe planet e emergjencës në letër duhet të përshtaten me realitetin e ri të terrenit në çdo qark.
Ministrja kërkoi që asnjë problematikë të mos neglizhohet. ”Në menaxhimin e emergjencave nuk ka ”detaje të vogla”. Suksesi varet nga informacioni i saktë, koordinimi i pandërprerë dhe reagimi i shpejtë në terren”,-deklaroi Koçiu.
Takimi konfirmoi se përveç Policisë së Shtetit dhe Shërbimit Zjarrfikës, në gatishmëri të plotë janë vendosur edhe strukturat e Mbrojtjes Civile dhe kapacitetet mbështetëse të Ministrisë së Mbrojtjes. Pjesëmarrja e ministrave Vengu dhe Demo sinjalizon një qasje të integruar, ku pushteti qendror, ai vendor dhe forcat e armatosura do të veprojnë bashkarisht. Ministrja e Brendshme e mbylli takimin me një apel për përgjegjshmëri institucionale. ”Na duhet punë, përgjegjësi dhe bashkëpunim. Ne jemi gati. Dhe të gjithë duhet të jemi gati”.