Ambasadat e huaja të përfaqësuara në Kosovë kanë reaguar ashpër ndaj moscertifikimit të Listës Serbe për zgjedhjet e 28 dhjetorit.
Ambasada e Shteteve të Bashkuara të Amerikës në Kosovë ka kritikuar Lëvizjen Vetëvendosje, duke thënë se përpjekjet e saj për moscertifikimin e Listës Serbe për zgjedhjet e 28 dhjetorit janë me vizion afatshkurtër dhe përçarës.
Në një reagim në rrjetet sociale, Ambasada ka theksuar se veprimet e tilla dëmtojnë stabilitetin e Kosovës, por edhe interesat e SHBA-së, përfshirë rifillimin e Dialogut Strategjik mes dy vendeve, i pezulluar që nga shtatori i këtij viti.
“Përpjekjet e VV-së për të bllokuar certifikimin e Listës Serbe për të marrë pjesë në zgjedhjet e Kosovës janë me vizion afatshkurtër dhe përçarëse. Të gjithë qytetarët e Kosovës duhet të jenë në gjendje të ushtrojnë të drejtat e tyre demokratike. Veprime të tilla dëmtojnë stabilitetin e Kosovës dhe interesat e SHBA-së, duke përfshirë rifillimin e dialogut tonë strategjik për të çuar përpara mundësitë për bizneset amerikane dhe të Kosovës”, thuhet në njoftimin e Ambasadës Amerikane në Kosovë.
Kritika për moscertifikimin e Listës Serbe janë dhënë edhe nga ambasadorët e Britanisë së Madhe dhe të Gjermanisë.
“Veprimet e tilla kërcënojnë ta shkatërrojnë reputacionin e fituar me mund të Kosovës si demokraci multietnike dhe të dëmtojnë marrëdhëniet me partnerët e ngushtë”, tha Jonathan Hargreaves, ambasador i Britanisë në Kosovë.
Ndërsa ambasadori gjerman e ka quajtur sjellje penguese, duke theksuar se zgjedhjet duhet të jenë të lira nga manovrimet politike.
Dy anëtarët e VV-së në Komisionin Qendror të Zgjedhjeve votuan kundër certifikimit të Listës Serbe për zgjedhjet e parakohshme. Shtatë anëtarë abstenuan, ndërsa dy të tjerë, anëtarja serbe dhe kryesuesi Kreshnik Radoniqi, votuan për.
E njëjta situatë kishte ndodhur edhe në zgjedhjet e rregullta parlamentare më 9 shkurt dhe ato lokale më 12 tetor, por pas ankesës në Panelin Zgjedhor për Ankesa dhe Parashtresa, kjo e fundit kishte urdhëruar KQZ-në të certifikonte Listën Serbe.