Temperaturat në vlerat minimale sot regjistruan vlerën më të ulët -7°C në qytetet e Korcës dhe Peshkopisë, jo aq sa priteshin kjo edhe për shkak të vranësirave të cilat nuk lejuan që termometri të zbriste edhe më tej. Në zonat malore edhe temperaturat maksimale mbetën në vlera negative ndërsa temperature më e lartë për sot u regjistrua në qytetin e Sarandës me 6°C ndërsa kryeqyteti 5°C. Në mesnatë pritet që në Dibër e Bulqizë temperaturat të shënojnë minus 9 gradë celsius.
Ashtu sic ishte e parashikuar moti sot ka qenë me vranësira mesatare dhe të dendura të shoqëruara me reshje dëbore me intensitet të ulët dhe mesatar në zonën e verilindjes dhe zonën e jugut deri përgjatë vijës bregdetare. Aktualisht reshjet e dëborës me intensitet të ulët dhe mesatar mbeten në zonën e Gjirokastrës dhe Korcës ndërsa përgjatë vijës bregdetare reshjet e dëborës janë konvertuar në reshje shiu.
Për orët në vijim parashikohet që moti të mbetet relativisht i paqëndrueshëm. Reshjet e dëborës do të mbeten prezente në zonat malore të jugut si dhe juglindje me intensitet të ulët dhe mesatar. Reshjet e dëborës me intensitet të ulët do të fitojnë terren gradualisht duke prekur edhe relievet kodrinore-malore në zonën qëndrore dhe ato verilindore.
Paqëndrueshmëria do të mbetet prezente deri në orët e para të mëngjesit të ditës së nesërme. Më pas dita nesër do të ketë mot të qëndrueshëm kryesisht të kthjellët por edhe të acartë. Ajo që duhet theksuar për nesër është një tjetër rënie e temperaturave më e ndjeshme në vlerat minimale. Gjithashtu kjo situatë do të shoqërohet me ngrica të forta ndaj të cilave duhet bërë kujdes.