Marash Kumbulla, mbrojtësi shqiptar që luan me Romën, nuk pati fatin të zbresë në fushë si lojtar në finalen e Conference League, në stadiumin “Air Albania” në Tiranë por kjo nuk e pengoi të festojë me skuadrën fitoren ndaj Feyenoord.
Me flamurin kuq e zi në dorë ai festoi në fushën e blertë me lojtarët e ekipit. Ndeshja Roma-Feyenoord përfundoi me rezultatin 1:0.
Roma ngriti një trofe në qiell siç nuk kishte ndodhur që nga sezoni 2007/08 (Coppa Italia) dhe fitoi një titull ndërkombëtar pas më shumë se 60 vjetësh (i fundit ishte Kupa e Panaireve 60/61).
Mourinho rishkruan historinë e klubit, por edhe të tijën, duke vendosur titullin e tij të pestë evropian nga pesë finalet e luajtura. Një çlirim për të gjithë tifozët Giallorossi, pas vitesh vuajtjesh dhe zhgënjimesh.