Ministria e Jashtme e Kosovës i ka propozuar presidentes së Kosovës, Vjosa Osmani lirimin nga detyra të të gjithë ambasadorët e Kosovës “të emëruar politikisht”.
Lajmi është konfirmuar nga zëvëndësministri i Jashtëm, Kreshnik Ahmeti përmes një postimi në rrjetin social Facebook.
Të gjithë ambasadorët e emëruar politikisht duhet të falenderohen për punën e tyre si dhe të hiqen nga postet diplomatike që kanë.
“Në përputhje me Ligjin, Ministria e Punëve të Jashtme dhe Diasporës (MPJD), ka përcjellë gjatë kësaj jave tek Presidentja e Republikës së Kosovës, propozimin për lirim nga detyra dhe tërheqje nga misioni diplomatik për të gjithë ambasadorët e Republikës së Kosovës, të emëruar politikisht”, ka shkruar Ahmeti.
Ai nuk ka dhënë detaje pse është bërë një propozim i tillë. Ndërkohë që më lidhje me këtë propozim ende nuk ka një reagim nga ana e Presidentes Osmani.