Dy bar- restorante në Vlorë dhe një lokal në Sarandë janë gjobitur pasi mbanin muzikën hapur pas orës 20:00.
Policia njofton se gjobat janë nga 1 milionë lekë për secilin nga administratorët e lokaleve.
Ndërkohë që prej disa ditësh tashmë me akt normativ muzika nuk lejohet në asnjë ambient shërbimi pas orës 20:00 në kuadër të masave për parandalimin e përhapjes së COVID-19. Kurse lokalet e natës dhe diskot e kanë të ndaluar kategorikisht hapjen.
NJOFTIMI NGA POLICIA
Vlorë, Sarandë
Policia ka ndëshkuar me nga 1 milion lekë gjobë, administratorët e tre lokaleve, pasi u konstatuan duke ushtruar aktivitet me muzikë në kundërshtim me Aktin Normativ.
Strukturat e Drejtorisë Vendore të Policisë Vlorë, në vijim të kontrolleve të ushtruara në subjekte të ndryshme, me qëllim parandalimin e përhapjes së COVID-19, kanë evidentuar dy bar-restorante në Vlorë dhe një lokal në Sarandë që vazhdonin të ushtronin aktivitet me muzikë pas orës 20:00, në kundërshtim me Aktin Normativ, duke mos respektuar kufizimin e përcaktuar nga Policia e Shtetit.
Për secilin nga këto subjekte, me administratorë shtetasit G. L., K. N. dhe F. M., shërbimet e Policisë kanë vendosur masë administrative 1.000.000 lekë.
Policia e Vlorës apelon për të gjithë administratorët e subjekteve që ushtrojnë aktivitet, të respektojnë me rigorozitet protokollet e sigurisë dhe masat kufizuese, me qëllim parandalimin e përhapjes së COVID-19.