Nga Hasan PASHA
Nata e zezë e 25 Majit 1996 nuk harrohet nga shqiptarët. Dhuna e regjimit Berisha arriti kulmin një natë para zgjedhjeve politike. Brezi i ri fatmirësisht nuk i ka përjetuar ato ditë tragjik, ndërkohë ne e kemi për detyrë të kujtojmë masakrën zgjedhore të atij viti.
Dhuna, presioni, burgosja, largimi nga puna nisi që nga korriku 1992 kur socialistët pas humbjes së 22 marsit fituan bindshëm në shkallë kombëtare zgjedhjet lokale dhe 1994 kur hodhën poshtë Kushtetutën që e bënte “mbret” Sali Berishën.
Strukturat shtetërore të kohës, Policia, Shërbimi Informativ Kombëtar, Administrata Shtetërore, forumet e kriminalizuara të Partisë Demokratike, të nxitur dhe ndihmuar nga pushteti bënë kërdinë në zgjedhjet politike të atij viti.
Natën e 25 Majit nisi operacioni ogurzi i burgosjes, dhunimit, kërcënimit të socialistëve në të gjithë vendit. Mati më shumë se çdo rreth tjetër në vend ishte shembull i abuzimit të pushtetit me opozitarët.
Barbaria e shtetit këtu në Mat nuk kurseu askënd. Në mesnatë u arrestuan drejtuesit e Komitetit Drejtues të PS-së, 40 burra nga zona të ndryshme u shoqëruan në qelitë e Komisariatit, komisionerëve të PS-së iu kërkua të mos ishin të dielën e 26 Majit pranë qendrave të votimit, ndryshe do të kishin pasoja të rënda.
Pas “natës së zezë” të 25 Majit 1996 masakra elektorale vijoi një ditë më vonë. Kutitë e votimit u mbushën nga efektivë policie, punonjës të SHIK-ut, ekstremistë të PD-së, etj. U përlanë vulat e qendrave të votimit, u përzunë forcërisht komisionerët e PS-së.
Kanë kaluar 26 vite nga përgjakja e zgjedhjeve politike në vend dhe autori i krimit kërkon të riciklohet, tenton të faktorizohet, manipulon të tijët.
Ne dëshmitarët e asaj kohe jemi krenarë që qëndruam, rezistuam, mbijetuam, u forcuam dhe tani kontribuojmë për të mirën e vendit.