Viti i ri shkollor për sistemin parauniversitar fillon më 16 shtator. Anila Ferizaj, përgjegjëse në Ministrinë e Arsimit tha për Report Tv se regjistrimet nisin me 2 shtator dhe përfundojnë në datë 15, ndërsa shpjegoi edhe të gjitha dokumentet që do të kërkohen për regjistrimin e nxënësve, që këtë vit ulen për herë të parë në bankat e shkollës.
TIRANE – 16 shatori shënon ditën e parë të shkollës për shkollat 9-vjecare dhe ato të mesme. Fëmijët në të gjithë Shqipërinë do të lenë pas pushimet verore dhe do të startojnë vitin e ri shkollor.
Anila Ferizaj, përgjegjëse e sektorit të programeve të zhvillimit të Arsimit Parauniversitar, shpjegoi për Report Tv se regjistrimet nisin me 2 shtator dhe do të mbyllen një ditë përpara rinisjes së sezoni shkollor.
“Regjistrimet si gjithmonë nisin dy javë para fillimit të vitit shkollor, e po ta llogarisim I bie që fillojnë në 2 shtator. Pra në dy shtator është dita e parë e regjistrimeve për të gjithë sistemin. Deri në një ditë para fillimit të vitit shkollor, prindërit dhe fëmijët mund të paraqiten pranë shkollave të tyre për tu regjistruar”-u shpreh Përgjegjësja e Sektorit të Zhvillimit Parauniversitar
Për të gjithë ata prindër që do të regjistrojnë fëmijët në shkollë, Ferizaj thotë se është e nevojshme dorëzimi i disa dokumenteve.
“Për klasën e parë, prindërve ju duhet që të paraqesin vetem certifikatën e vaksinimit, ose vërtetimin e vaksinimit nga qendra shëndetësore. Kështu që nëse nuk e kanë ata duhet ta marrin dhe ta paraqesin pranë shkollës së tyre dhe duhet të paraqesin vërtetimin e ndjekjes së kopshtit të fëmijës nëse fëmija ka ndjekur kopshtin dhe çfarë grupi ka ndjekur, grupin e parë, të dytë apo të tretë. Fëmijët që ndjekin klasat e tjera pra e dytë e tretë e kështu me radhë, duhet të paraqesin dëftesën e klasës paraardhëse. Edhe nxënësit e klasës së 10-të duhet të paraqiten në shkollën e zonës së tyre me dëftesën e lirimit”-tha Ferizaj
Nuk janë të pakta rastet që prindërit dëshirojnë që fëmijët e tyre të arsimohen në shkolla që nuk i kap zona e tyre e banimit.
Ministria e Arsimit sqaron për Report TV se në 6 ditët e para të regjistrimit do të kenë përparësi fëmijët e zonës, vetëm nëse do të ketë vEnde të lira, atëherë do të kenë mundësi edhe fëmijët të cilët nuk i përkasin njësisë administrative ku ndodhet shkolla./ shqiptarja.com