Ambasadori i Ukrainës në Serbi, Volodymyr Tolkach, ka deklaruar se Ukraina vazhdon “të mbështesë integritetin territorial të Serbisë që nga viti 1999” dhe se nuk e njeh Kosovën si shtet të pavarur, raportojnë mediat e huaja.
Duke iu përgjigjur pyetjes se a është i pakënaqur me faktin se Serbia nuk ka vendosur sanksione ndaj Rusisë dhe si i sheh deklaratat e disa deputetëve ukrainas se Ukraina duhet ta njohë Kosovën, Tolkac thekson se Kievi gjithmonë në nivel zyrtar thotë se mbështet territorin e Serbisë.
“Ky qëndrim nuk ka ndryshuar kurrë. Prandaj, ne nuk e njohim zyrtarisht Kosovën si shtet të pavarur dhe gjithmonë e mbështesim integritetin territorial të Serbisë.
Pse nuk duam ta mbështesim Kosovën, kur Kosova plotësisht na mbështet? Ndonjëherë është shumë e vështirë të japësh një përgjigje të plotë.
Ne gjithashtu do ta vlerësonim nëse mund të shihnim se si Serbia gjithashtu mbështet plotësisht Ukrainën.
Kjo jo vetëm që do të na bënte të lumtur, por do të kuptonim edhe qartë se e gjithë Europa na mbështet”, theksoi ai.