Edhe pak ditë na ndajnë nga festimet e Halloween-it dhe të shumtë janë dashamirësit e kësaj feste që janë mbledhur për të parë mijëra kunguj që janë gdhendur dhe ndriçuar në mënyrë të hollësishme në malet Santa Monica pranë Los Anxhelosit. E quajtur “Netët e Xhekut”, ngjarja është një vend i mrekullive të Halloween-it që përmban gjithçka, nga dinozaurët dhe alienët e deri tek portrete të yjeve të Hollivudit të gdhendura në kunguj.
Producenti Tobias Daniels tregon për Reuters: “Gjithçka që është në shteg është bërë nga fenerë Jack-O. Pra, nëse jeni duke ecur nëpër tokën e dinosaurëve, nëpër periudhën Jurassic dhe jeni duke parë një Triceratops ose një T-Rex, të gjitha i keni këtu”.
“Nights of the Jack” i lejon vizitorët të ecin nëpër një shteg të gjatë nëpër ekspozita të shumta tematike të bëra nga kunguj. Princeshat e Disney-t, Alice in Wonderland, si dhe fantazmat tradicionale të Halloween-it janë të gjitha pjesë e ngjarjes së ndriçuar në King Gillette Ranch. E teksa në Danimarkë në prag të festës e quajtur ndryshe “dita e të vdekurve” është ndërtuar me lego kungulli më i madh në botë.
Katër deri në pesë mijë kunguj janë përdorur për ekspozitën në Los Angeles dhe duhen rreth 25 minuta për të përshkuar të gjithë ekspozitën e kungujve, e cila do të qëndrojë e hapur deri më 1 nëntor.