Holanda i dërgoi kërkesën e parlamentit të saj, KE-së për pezullim të lëvizjes së lirë për shqiptarët, duke përmendur nenin 8 (2) të Rregullores 2018/1806.
Por çfarë përmendet në këtë nen të legjislacionit të BE-së?
Ky nen i referohet kushteve të caktuara sipas të cilave vizat mund të pezullohen përkohësisht, bazuar në të dhëna relevante dhe objektive. Një Shtet Anëtar i lejohet të njoftojë Komisionin brenda një periudhe dy mujore, nëse janë rritur kushtet krahasuar me të njëjtën periudhë të një viti më parë. Në letrën e dërguar nga Groot jepen me tabelë këto të dhëna që sipas holandezëve plotësojnë kriteret për pezullimin e vizave për shqiptarët në BE.
Sipas holandezëve këto të dhëna janë argumente pse pezullimi duhet të bëhet aktiv për një periudhë prej 9 muajsh, siç parashikohet në legjislacionin e BE-së. Më konkretisht në pikën 6 (a) të nenit 8 ku thuhet: Komisioni miraton një akt zbatim që përkohësisht pezullon përjashtimin nga kërkesa për vizë për shtetasit e vendit të tretë të interesuar, për një periudhë prej 9 muajsh.
Komisioni ka një muaj nga sot për të shqyrtuar kërkesën dhe të dhënat e përmbajtura dhe pezullimi mund të miratohet nëpërmjet shumicës së thjeshtë të Shteteve Anëtare të BE. Mirëpo kjo periudhë përkon edhe me vendimin e Këshillit për rekomandimin e pozitiv për çeljen e negociatave për Shqipërinë dhe Maqedoninë.
Gjatë periudhës së pezullimit, Komisioni do të “krijojë një dialog të zgjeruar me shtetin e tretë në fjalë, me qëllim që të korrigjojë rrethanat në fjalë”.
