Nesër do të nisë sesioni i ri parlamentar. Seanca është njoftuar në orën 17:00 të pasdites. Në rendin e ditës është miratimi i kalendarit, por edhe votimi i dekretit të shkarkimit të Ditmir Bushatit dhe emërimit të kryeministrit Edi Rama edhe në postin e Ministrit për Europën dhe Punët e Jashtme. Presidenti Meta dekretoi shkarkimin e Bushatit dhe emërimin e Edi Ramës në postin e kryediplomatit para dy ditësh, ndërsa nesër kryeministri do të marrë zyrtarisht edhe drejtimin e dikasterit të ministrisë së Jashtme.
Gjithashtu nesër do të zëvendësohen edhe vendet që lanë bosh në komisione ministrat e rinj të kabinetit qeveritar. Vendin e Erjon Braçes në postin e kryetarit të Komisionit të Ekonomisë dhe Financave do ta zërë Arben Ahmetaj. Peleshi pritet të marrë drejtimin e Komisionit të Veprimtarisë Prodhuese në vend të Eduard Shalsit. Bledi Çuçi pritet që të zëvendësohet nga Blerina Gjylameti në pozicionin e bashkëkryetarit të Reformës Zgjedhore, ndërkohë që si nënkryetar i Komisionit të Integrimit dy janë emrat më të mundshëm; ish-ministri Bushati dhe deputeti Ervin Bushati.