“Investimet që kryhen në bashkinë e Matit nuk kanë lidhje me fushatën elektorale”. Në çdo takim elektoral kryebashkiaku Agron Malaj është shprehur se fondet e dhëna nga qeveria shqiptare dhe donatorët nuk kanë lidhje me zgjedhjet por me krijimin e kushteve më të mira për cdo qytetar.
Fakti që vetëm pak ditë pas zgjedhjeve lokale vijnë lajme të mira për të tjera investime në Mat tregon se ato nuk kanë lidhje me fushatën dhe se kjo trevë do të ndryshojë akoma më shumë gjatë mandatit të dytë qeverisës të kryetarit Agron Malaj.
Në lagjen “Pjetër Budi” Burrel vijon puna me intensitet për veshjen e pallateve me sistemin kapot (termoizolim). Falë këtij investime pallatet gjatë verës do jenë më të freskta dhe gjatë periudhës së dimrit do jenë me të ngrohta. Synohet që ky projekt të shtrihet në të gjithë qytetin, në 114 pallate.
Bashkia Mat njoftoi sakaq se shumë shpejt do të nisë puna për rikonstruksionin e gjimnazit “Pjetër Budi” në qytetin e Burrelit. Matjanët e kanë konsideruar këtë shkollë si “Universiteti i Matit”, cka do të thotë se pas këtij investimi kjo shkollë do të jetë më funksionale dhe më e frekuentuar nga të rinjtë matjanë.
Po këto ditë nisi puna për rikonstruksionin e Pallatit të Kulturës “Shefqet Doda” në qytetin e Burrelit. Pas përfundimit të punimeve në këtë objekt të rëndësishëm do të krijohen kushte më komode për cdo grupmoshë, do të shtohen aktivitetet, sidomos për të rinjtë.
