Kuvendi miratoi sot ndryshimet në Kodin Rrugor në Republikën e Shqipërisë me 101 vota pro, 1 abstenim dhe 6 kundër.
Deputeti socialist, Xhemal Qefalia, i ftuar në “Drejt” përshëndeti ata deputetë të opozitës që bashkuan votat me mazhorancën.
Qefalia: Kalimi i kodit rrugor ka qenë nevojë imediate për të bashkuar votat dhe për të pasur një kod rrugor që ti përgjigjet nevojave aktuale duke marrë në konsideratë përvojat e shumë vendeve europiane. Janë vendosur disa kufizime për drejtimin e mjeteve të personave nga viti i parë në vitin e dytë të lejes së drejtimit, do kenë një fuqi motorike më të vogël. Së dyti, afati për shlyerjen e gjobës nuk do të jetë 5 ditor por nëse do të kryhet ekzekutimi brenda 15 ditëve do të jetë në 50% të kësaj gjobe. Shpejtësia e qarkullimit në autostrada që plotësojnë kriteret do të jetë 130 km/h,do hiqen postoblloqet e policisë që shpesh herë kanë ndikuar negativisht në krijimin e aksidenteve. Është për tu përshëndetur dhe pjesa e opozitës që e ka çuar si rrallëherë numrin në 101 votues.
Një nga ndryshimet në Kodin Rrugor është rritja e afatit të rinovimit të patentës, i cili bëhet çdo 15 vjet, në krahasim me 10 vjet që është aktualisht.