Në meshën e parë për këtë vit, Papa Françesku u lut për fundin e luftës në Ukrainë, ndërsa përkujtoi edhe Benediktin XVI që ndërroi jetë të shtunën në ditën e fundit të 2022-shit. Meshën e kësaj të diele, që është edhe dita e parë e 2023-shit, Papa Françesku e shfrytëzoi për t’u lutur për fundin e luftës në Ukrainë dhe vuajtjeve për njerëzit.
“Në këtë ditë, ne ndiejmë edhe më fort kontrastin e luftës në Ukrainë dhe zona të tjera që mbjellin vdekje dhe shkatërrim. Tek popujt e gjithë botës po lartësohet thirrja: Jo luftës! Jo riarmatimit! Të ardhurat të shkojnë për zhvillim, shëndet, ushqim, arsim e punë”.
Festa për Vitin e Ri në Vatikan u zbeh prej ndarjes nga jeta të Benediktit XVI, të parit Papë të dorëhequr në 6 shekujt e fundit. Një lutje Papa Fraçesku e bëri edhe për të.
“Të bashkohemi me zemër dhe shpirt për të falenderuar Zotin që na dhuroi këtë shërbëtor besnik të Ungjillit dhe Kishës”.
Trupi i tij do të qëndrojë në bazilikën e Shën Pjetrit që prej të Hënës do të jetë e hapur për homazhe për 3 ditë, para se të përcillet për në banesën e fundit më 5 Janar.