Papa Françesku shpreh “ngushëllimet e tij të thella” për familjet e 59 të rinjve që humbën jetën në Maqedoninë e Veriut, në orët e para të mëngjesit të kësaj të diele, si pasojë e një zjarri vdekjeprurës në një lokal nate në Koçan të Maqedonisë së Veriut.
Papa përcolli fjalën e tij përmes një letre të nënshkruar nga kardinali Pietro Parolin, Sekretar i Shtetit, drejtuar peshkopit Kiro Stojanov të Shkupit.
Përmes letrës Papa shpreh “ngushëllime të thella për familjet e viktimave” si dhe “afërsinë e tij shpirtërore me të lënduarit”
Zjarri në diskotekë ra rreth orës 03:00 gjatë një koncerti ku morën pjesë 1500 persona në një lokal nate në Koçan.
Dyshohet që zjarri të jetë shkaktuar nga fishekzjarrët. Organizatorët e ngjarjes dhe pronarët e lokalit janë arrestuar.
Shumica e viktimave janë të moshave nga 14 deri në 27 vjeç.
Qeveria maqedonase ka bërë përpjekje maksimale për të përcaktuar shkakun e tragjedisë.
“Sot është një ditë e vështirë dhe shumë e trishtueshme për Maqedoninë”, ka shkruar kryeministri Hristijan Mickoski, “humbja e kaq shumë jetëve të reja është e pariparueshme dhe dhimbja e familjeve, të afërmve dhe miqve është e pamatshme”.